無無聊聊(六)

湊完仔夫婦二人靜靜的坐在梳化上閑聊嘆世界。 老婆想起今日買菜的趣事,講呀講。 老婆想起週末燒烤的準備事項,講呀講。 老婆想起朝早與太太們說的笑話,講呀講。 男人好似有又好似無地聽,偶爾「唔」一下我;望一望錶夠鐘追電視劇噃,跟手有人將辦公室用開的那套搬入屋企,好認真地望住我叫我「講重點」。 吓?!你玩我呀,兩公婆講到明係閑聊有鬼重點咩。 重點係…………你經已激嬲隻老虎乸! 一埸你追我逐通屋跑,比Lost在森林迷失好玩,比Fringe更古靈精怪;比體育節目更能消化飯後高脂肪呢。

出遊裝備

打早波前夕,老爺*週屋*騰嚟騰去一副我好忙你快D幫手啦嘅樣。 良辰美景車衣機電視機在前,以其人之道還其人之身的想法在心,我應了句我比你仲忙呀。 於是乎一向鄙視我寫清單的男人,乖乖地列寫明天可能/極可能/無可能需要的東西。 太陽油 太陽眼鏡 傘 (咪玩啦,邊個會擔遮呀?) 替換衣服 (何解呢?又不是去健身) 水 x 2 ; 食物 x ∞ (老爺好幽默呀) 玩具,電風扇,望遠鏡 …………………外加立立雜雜的一大堆老爺認為的必需品。兩個golf袋幾十枝桿,兩個人出遊幾個鐘竟然要擺個旅行袋在車尾! 不過呢點都要讚一下肯湊仔打波全程服侍周到兼大個仔肯自己執野的男人。 *注意,佢基本上係跟住我週圍行,不斷地在我面前扮忙應該係想博我同情幫下手。

角色調換

一向要早起的我難得可睡至日上三竿,皆因天公造美令老爺同小鬼可以去打早golf,媽媽這一覺呀,無雜音無打爛碗聲無一連串的媽呀媽。開心到甜到呢現在一諗仍然陰陰咀地笑。 一向奉旨坐低等食的老爺良心大發現,自動做英雄去買餸煮飯。這裏週未的超市與香港打颱風時的百佳一樣勁擠迫,人迫人之際老爺打求救電話回家問可否只買今晚的飯菜呀,一大一小兩袋餸足足買了一個半鐘頭。 老爺為買柴米油鹽奔波兼張羅小鬼的吃喝玩樂,不是一個半個鐘而是整整的一天。汗流浹背地在大太陽底下燒烤,閑閑地坐著曬太陽的我除了無聲地想講你都有今日囉的風涼話之外還柔柔的說了愛意。