我的孩二

雙手捧著一大籮衫的女人,問安坐在大班椅上看報紙的老爺可否幫手接電話。 幾秒後電話仍在追魂,老爺答曰,唏有重要事D人會留言架啦。 瀕臨抓狂邊緣的女人轉移線視兼狂深呼吸叫好幫手聽電話,是Ⅰ姨呢小人有禮對答直至媽媽放低籮衫等有時間熨同接。 左一件右一條執起老爺不願放入籃的污糟衫,搜索歷時三分鐘,夠切一個橙端去俾大少;小鬼挑通眼眉知媽媽要洗衫,咚咚咚跑入房出盡吃奶的力抱住只比他細一點的洗衣籃放在地牢。 容忍至止佛都有火,扮晒輕描淡寫地問仍嘆緊的老爺可覺得需要幫下手呢?偏向虎山行的大佬說你都無叫我幫你。哦?!阿仔七歲都曉得自動自覺做呢做路,省下我大叫五百次「可否幫我…..」然後被人怨長氣,是我們的錯了吧,竟然不懂用你的外星語言叫你呢。 忍、忍、忍,唔好成日發爛渣。 ++++++++++++++++++++++++++++++ 老爺見我在抹窗便死死地氣自己入廚房整早餐,拿住報紙起勢擦眼尾哨到係乳酪加自製grinola,大叫咪食住。跑到廚櫃倒入一匙已磨好的flax seed,有人we嘩鬼叫唔好搞我啦唔要呀唔要呀… 無味架,食唔出有咩分別架,再三保證後大少心不甘情不願扁起咀細細啖地吃,務求要食出分別來。 你朝朝早都食架啦你唔知啫,我說為你好想你健康D又係我錯呀?成日都激我激到癲終有一天下的不是健康食品是瀉藥呢。 有人終於識驚馬上由扁咀變至陪笑的小人口臉,係我衰,今日返晏D陪你運動好嗎? 唉,見好唯有收火,往好的方向想其實你已盡量醒水,十年前的你連哄我也不懂呢。孩二只有在對方面前我們才會如斯孩子氣能發脾氣吧。