關於師奶我

家庭:

我屋企有一個魔星,喜歡喋喋不休由朝講野講到晚。

有時聽得明,有時令人好費解,至愛的遊戲係同媽媽我鬥智,「十萬個為什麼」一問一答似乎永無休止。

德文好過中文,英文又好過德文,三台語言懶理你明定唔明總之一輪嘴講完至算。

++++++++++++++++++++++++++++++

我屋企有一個老公,花名叫老爺,皆因我服侍週到似足佢奴婢。

此人最厲害之處係頂得順我日哦夜哦,永遠也不投訴我有幾煩。還有令阿仔迷上打高爾夫球,脫我於苦海令我成為一個有假可放的全職媽媽。

鬼聲鬼氣的鬼佬,為解我思念香港同胞的愁,多年前開始學廣東話。講得最正宗係酒樓叫點心,叉燒包、蝦餃、海鮮燒賣、腸粉等等如數家珍。

+++++++++++++++++++++++++++++++

至於我,家頭細務湊仔煮飯乃等閑事,每到稅季家中盤數公司盤數由我搞,每星期三日去學校做半日義工,兩日半去兩個義工組織,為婦女為動物,應該係正義感過份澎湃所致。

為人八到暈,街上校裏媽媽一大班全部都識,一月一次大型咖啡午餐聚會。坐唔得低無時停,有時愛煮呀焗呀車呀寫呀彈呀玩呀。

身兼數十個職位,最大的得著是過得好開心好充實好有意義。

我們這一家是快樂的,阿仔唔駁嘴,老爺唔激我,個陣。