師奶一名-身處加國﹐身負重任﹐身兼數職

Posts tagged ‘公主’

擬人症

我家除了一家大小瘋瘋癲癲,入門一年有多的小狗亦開始感染到瘋狂細胞。弄得狗不像狗,竟然開始狗模人樣。以下是經多月觀察的心得:

1.有自己私家狗竇唔用,晚晚同我老爺爭床位。老爺眼見狗都踩上佢心口決定趕狗落床。公主唔驚都不突止,仲眼睥睥兼低聲投訴,「你唔好再郁我嗱下,仲郁喎,我去阿媽到告枕頭狀。」

2.喜歡用後腳行路。唔係講笑,狗仔細細竟然可以由廚房行到飯廳。小朋友見解獨到,話公主可能嫌自己矮細,所以學人tiptoe喎。

3.愛爭風呷醋,每逢阿爸阿媽同小朋友玩無論佢幾眼瞓都一定會嚟踩場。實行有你無理都要玩下先。

4.姣婆愛照鏡,逢經過有鏡的地方都要照下欣賞下自己。有人仲因為隻狗鐘意照鏡而甘願破壞屋企的整體性,硬係加左塊落地鏡俾公主日照夜照。

5.患有返學妄想症,每次去行街散步例必帶你去小鬼學校。朝朝八點半都會坐係門口等返學。

6.當正自己係生番個大家姐,閒來無事會去搞下生番一天一地的車仔,得到口之後會發足狂奔,兼收埋架車。到目前為止已有四架失車未尋獲。

7.又,有時當自己係生番細妹,俾人鬧或惹禍後會去佢間房到尋求庇護。生番會對七孔生煙的媽媽講「佢仲細,咩都唔知識,慢慢教啦」,望住公主個得戚樣阿媽血都想嘔呀。

「想唔想玩呀?」                                          「我有禮物,你有無?」