師奶一名-身處加國﹐身負重任﹐身兼數職

Posts tagged ‘我係街方保長’

師奶閒聊

早幾天烹飪學校進行訂期維修媽媽唔駛返工送完小鬼返學便去了B太家嘆下茶吹下水。

講下暑假做D咩好,去邊度報summer camp;又講下大家老公壞話平衡一下自己心理,聽完講完笑到肚痛兼標眼水,不一樣的老公卻做著一模一樣樣的蠢事,唉~

之後講到小B女已成功地potty train,B太終於可以同尿片講再見啦,開心到呢。跟手我講起小鬼細個時返香港探親歷時兩個月已成功戒片加零意外,回到加國同老公講兼夾勁自豪極度讚揚小鬼有幾醒有幾勁。

B太:「兩個月便成功又真係幾叻仔呀!」

師奶:「咪係囉!我讚完一大輪你知唔知老爺講咩呀?」

B太:「係咪讚揚你教得好呀?」

師奶:「係鬼呀,阿老爺啤我一眼然後超串咀話"嘩你個仔識去廁所開大開小好巴閉呀!",根本唔明戒片對我們來說是件多大的事。」

之後的一個小時我們繼續吹水傾閒計兼八掛一下,完完全全係一個師奶的架勢。

廣告

新春報喜

昨天勞師動眾的義賣日加晚宴籌款,得到好多好多親朋好友的支持鼓勵,終於完滿結束。

扣取所需成本,總共籌得一萬五千元愛心捐款。一半會捐去UNICEF,另一半將會送到紅十字會,希望為苦離裏的人們送出一點關懷愛心。

一個人的力量也許卑微,但集眾人之心力就變成了件大事。新年裏,有餘錢的話請慷慨解囊;情人節與其送花送禮,何不將它化為善款用你愛侶的名字做件大大的好事呢。

一整天的走來走去有點累,有好多野想分享,莫奈何敵不過周公的吸引。

祝大家新年喜氣洋洋,善長人翁善有善報。

停課

今晨起身,一天一地閃亮亮的白,風大到門前大樹似有倒塌危機。一邊嘆咖啡看報,電台話風速58km/h,負四十度,心想死啦,果真字正腔圓無懶音的廣播員閑閑的一句「停課」。

究竟停課一天對師奶我的影響有幾大?

大聲到呢,對面屋都可以聽到剛睡醒小朋友的淒厲叫聲。

大劑到呢,一班師奶阿媽要急忙想辦法安慰就暴動的小朋友。

原本星期六日因懶惰後堆積如山的家務要今日做,原本要去超市上倉堆補空空如也的冰箱與 pantry,原本要開始整下個月試食會的各式食物,N件想做未做懶得做的事正在名正言順做唔到。

小朋友玩左我一大朝後皇恩浩蕩(由六至十一點),決定去練琴。趁此空檔超快地向其他頭痕的媽媽求助,最後E媽以大無畏精神接收成條街的小朋友。點知,我架迷你車仔因積雪太深連 driveway出唔到。但係呢屋企咩都無,巧婦難為無米之炊呀,一定要去超市。極無助時,B太架七人van載住其他師奶如奇跡般抵達,我聽講你想去買餸喎,仲唔上車?

風雪雖大,敵不過一班同心合力的女人。

人情味

我住的這一條街,家家戶戶都互相認識。基本上成條街的阿媽阿太組成了一間間托兒所。

今日住街尾的阿E太跑來我家門口,十萬火急地按門鈴。原來呢,是要借用我兩個焗爐。一邊係我個廚房到煮呀焗呀,一邊嘆咖啡曲奇;兩個女人一個廚房竟然出奇地和諧。

電話響,喂去唔去行街買菜呀?唔得呀,不如你來我家吃午飯。一屋女人齊齊吃蛋炒飯,人聲笑聲震去屋頂上冷冷的白雪雪。

哎呀,夠鐘要去接魔星放學啦,我接埋你個女同你個仔,你地幫我看屋啦。回家路上,一拖三,吱吱喳喳。路經隔我兩間屋的阿B媽門前,喂,今日暖洋洋我帶D小朋友去滑雪,魔星同阿E女阿M仔一齊去呀?最後B媽心口掛個勇字,一架七人車坐滿了3至6、7歲的小朋友。

我住的地方或許太偏僻,冬天有點太凍,天黑得太早;但人情味搭夠。

天怒人怨

今日去看電影﹐雖然片子不是我杯茶﹐但小朋友興高彩烈媽媽唯有舍命陪太子吧。

排隊乃等閒事﹐耐心等一等站一會兒﹐有什麼原因人家一拖三要抱怨要插隊要口出穢言﹐要教壞小朋友呢?

看戲時關手機兩小時﹐有多困難?你有閒情逸致才會看戲﹐為何要邊看邊傳短訴邊講電話呀大忙人?

最討厭的好戲在此﹐一歲小孩哭鬧不止三十分鐘﹐媽媽企圖於細小座位換屎片﹐爸爸只顧吃爆谷喝汽水懶理兒子猛烈攻擊前座的魔星。

只想開心看一場不好看的戲﹐享受天倫之樂﹔奈何不顧他人感受的人太多﹐見識到社會的一些畸形怪狀。

後話﹕七年前的我會當面罵人﹐現今魔星在旁只能對人好言相勸。滿腔怒火只能長嘆一聲……

阿媽好威風

老爺話我係街方保長﹐因為我覺得咩都關我事﹐睇唔过眼既野一定要出聲。

話說阿仔學校門口有好多家長貪方便﹐莫視雞拿咁大個既NO STOPPING/PARKING sign,攞d小朋友既安危離教非。有d家長仲出位到叫+教小朋友橫过馬路﹐唔好等patrol啦﹐會遲到架。。。

唔知大家想唔想像得到呢個畫面有幾危險﹐幾恐怖。呢d家長個個都有carseat,有安全氣袋﹐但係點解可以咁無安全意識?

因此街方保長聯同學校成立了一個‘阿媽交通巡邏隊’﹐同社區警察合作發警告信俾呢d無良父母﹐希望有阻嚇作用啦﹗

*當晚小魔星同爸爸講﹐媽咪好厲害呀~