個人簡介:
其實自從轉行做師奶後為自己行街買衫似乎巳經成為過去式。面對極度快高長大的魔星,一年要買兩次衫褲鞋。漸漸打橫發展的老爺,一年前的度身訂做西褲有爆爆地的現象。我係唯一一個可以著得落十七歲時的牛仔褲,而條褲仲係無穿無爛,又似乎不會增磅的人。
敗家事件簿:
師奶忍夠自己由年少時至今養成的瘋狂行為,同一件衫最高紀錄一口氣買了八件不同顏色。(有D內疚囉,只穿過黑灰紅。)
老爸口痕地說了句,你個 walk in 衣櫃要擴建啦。(至憎俾老豆’潤’架啦。)
小朋友同老友小E講,你唔可以入我媽媽個衣櫃呀,會蕩失路架。(童言無忌啊!)
存貨:
上班套裝 – 九成發霉中,黑色的兩三套偶爾會著去開會
休閒服 – 一D都唔休閒的我日日都著住衛衣、長袖衫,大約有二十多件夠著一年
內衣 – 八成新,可能要買一上一下過新年
禦寒衣物 – 三件羽絨,兩件長褸
運動服 – 兩條yoga褲,一條防風跑褲
飲宴晚裝 – 五六條裙,應該無機會有藉口買新貨
其他功能性衣服 – 大鬼把啦,N年前舊貨
作戰原則:
假話 – 以身作則,為小鬼立榜樣
真話 – 打斧頭儲機票錢週游列國
初步計劃:
衣服鞋襪唔殘唔爛唔買。要學會三思而後行以免俾口多阿Dra唱通街。
++++++++++++++++++
有興趣又有勇氣的你,支持環保,支持儲錢養老。
Comments on: "新年新搞作:一年只買廿件衫" (3)
[…] 新年新搞作:一年只買廿件衫 關連閱讀: 一卡、紋眉、玉鐲子 (上) 一卡、紋眉、玉鐲子 (下) […]
[…] 戰友:新年新搞作:一年只買廿件衫 […]
[…] 戰友:新年新搞作:一年只買廿件衫 […]